Traditionalist reviews the latest work of Hip Hop Artist

Te Kupu: KO TE MATAKAHI KUPU

Nä Dean Hapeta.

He mea tautoko e Kia Kaha, e Universal me Te Mängai Päho.

Nö HIRINI MELBOURNE na kohinga whakaaro.

He Köpani Püoro ärero rua. Ko tëtahi Köpani kei te ärero Päkehä. Ko tënei tuhinga kohinga whakaaro mö te Köpani Püoro ärero Mäori.

Heoi, ka pai ki au tënei taonga tukuiho mai i a Dean Hapeta. Pai ana täna hanga mai i tönä ara puoro hei rapu i te märamatanga, hei whakaohooho i te wairua, hei whakatö whakaaro.

E rua tekau ngä waiata i horahia ki runga i te Köpani Püoro nei, ä, kei roto o ia waiata he rerenga whakaaro. Inä ko te tauira tatito i whäia hei hanga i ngä waiata nei ko te rerenga moemoeä.

Nö reira e taea ai te hopu i ngä märamatanga o ngä waihanga nei, me möhio anö te tängata ki te hanga kupenga kapo moemoeä, Kaua e kapo noa i te oro o ngä taonga whakatangitangi noaiho, e kimi noa ränei i te tikanga o ia kupu.

E hou ai te märamatanga, me tätari ngä oro, kätahi ka tühono atu ai ki te mita o ngä kupu, o ia rärangi körero hoki, kätahi ka äpiti atu ai i ngä rangirangi o ngä taonga püoro. Mä te përä rawa e taea ai e te kaiwhakarongo te rere ki roto i ngä kopikopikotanga o te hinengaro o te kaitito.

Mä te whakahui rawa i enei mea katoa e ataata mai ai ngä kitenga, ngä rongo me ngä whakaaro o te kaitito. E kore e taea ngä whakaatatanga mai a te kaitito ki te rere noa te kaiwhakarongo ki runga i te hau o ngä oro.

He kura whakaata tënei taonga i te tohungatanga o Dean Hapeta ki te whakahui mai i ngä oro o te ao o ngä reanga hou. He mea waihanga, he mea äta whakaaro i runga i ngä pukenga o te kaitito. He kaupapa anö i waihangatia ai te püoro, ä, käore mö te whakangahau, mö whakakorikori tinana noaiho ränei.

Arä noa atu anö ëtahi kaupapa. Inä ma te waiata hei kawe ngä rongo, ngä aureretanga me ngä whakakitenga ä te iwi mö te iwi. Ki te kore he whakakitenga, ka ngaro te iwi. Kei roto i ngä waiata ngä tohu mö tënä iwi, mö tënä iwi.

Mä te waiata hei herehere ngä muka tängata i roto i ngä mahi me ngä whakahaere a te iwi. Ka täea hoki e te waiata te hono i te ira tängata ki te ira atua.

Ki au kei roto katoa ënei ähuatanga i te waihanga Köpani Püoro nei, Käore tënei waihanga i püpü mai noa i te kore. E puta ai he taonga, me whai pukenga, pümanawa, akoranga anö te kaihanga o taua taonga. He roa tonu te wä e whakaaro ana, e hurihuri ana, e karapinepine ana i mua o te whakatinanatanga mai o te whakaaro.

Kei roto o ia waiata ka taea te whai i ngä tätai whakapapa o tönä oro. Ko ëtahi i whakahekea mai i te hip hop, i ngä waiata rere wairua, i te rap, i te reggae me ngä momo rangirangi mai Amerika ki te Tonga.

Heoi i waihangatia ake hoki i roto i ngä aupehitanga a tauiwi, o te pöhara, o te rawa kore me ngä rerenga hangarau o te ao hou. Ahakoa rä ënei ähuatanga, ki au ko ënei tauira i whäia e Dean hei whakawhänui i täna titiro ki a ia anö, ki tönä iwi me tönä ao. Mä te ara o te püoro te hunga rangatahi e whakahoki mai ki tö rätau ao Mäori.

Whakarongohia te waiata Te Maringitanga, Kei te waiata nei te huinga o ngä tohungatanga o Dean. He mana to te kupu. He oro to te kupu. Whakahui kia tinä, kia rongo ai te pö, kia rongo ai te ao. Tënä koe Dean mö tënei taonga koha.